Autor: Lobitos Alves
Oinsá servisu MAF nian promove Blue Ventures iha Timor-Leste hodi suporta komunidade kosteira sira iha illa Atauro hodi hadi'a fali sira nia ekosistema tasi nian.
Tasi hanesan fonte prinsipál ida hodi sustenta moris ba povu Bikeli, rejiaun kosteira ida ne'ebé lokaliza iha parte norte illa Atauro, iha ne'ebé ema barak depende ba atividade peska nian hodi sustenta sira-nia moris.
Agora, ekosistema tasi nian iha área ne'eba hetan ameasa, no atividade peska nian tun daudaun, obriga komunidade lokál sira atu buka dalan foun atu sustenta sira nia moris.
Antonio Pereira esplika tanbasá tasi ne'e importante tebes ba sira.
"Hau nudar peskadór lokál ida husi Bikeli, no ha'u halo serbisu peska no kuda budu-tasi. Ha'u komesa peska bainhira ha'u tinan 11, no ha'u sei peska nafatin to agora," dehan Sr. Pereira.
"Ikan sira ne'ebé ha'u kaer prepara ba han, no balu fa'an atu hetan osan hodi ajuda ha'u-nia oan sira nia eskola."
Nia komunidade servisu hamutuk ho Blue Ventures Organizasaun Non-lukrutivu ba konservasaun, ne'ebé to'o iha illa Atauro ho aviaun MAF hosi kapitál Dili. Señor Pereira mós esplika tanbasá importante atu implementa métodu konservasaun tradisionál Tara Bandu hodi proteje sira nia abitat tasi nian.
Nia hatete: "Peska ikan agora susar tebes tanba iha ikan uitoan de'it kompara ho tempu uluk, tan ne'e ami muda ba kolleta budu-tasi.
Peska ikan agora susar tebes,...tan ne'e ami muda ba kolleta budu-tasi.
"Hau ba Beloi, ami nia suku viziñu ne’ebe lokaliza iha parte leste husi illa Atauro, durante semana rua, no ami haree rezultadu Tara Bandu ba peska, hatudu katak ikan sira ne'e barak tebes.
Tan ne'e, ami fila fali ba ami nia suku hodi hahú atividade Tara Bandu ba peska, ho asisténsia husi Blue Ventures iha Timor-Leste, hodi suporta ami konserva ami nia ikan."
Tara Bandu nu'udar Timor-oan nia konseitu lei ne'ebé ho objetivu atu konserva rekursu naturál sira no asegura sira nia utilizasaun sustentavel ba futuru.
Ida ne'e inklui restrisaun peska no determina área atividade tasi nian atu halo balansu ba atividade umanu no ekosistema naturál, halibur koñesimentu tradisionál ho métodu konservasaun modernu sira.
Armindo Marques, Ofisial Programa Blue Ventures no rezidente lokál ida husi Bikeli, esplika oinsá nia ekipa suporta komunidade lokál sira hodi estabelese esforsu ba konservasaun tasi nian.
"Komunidade sira nia hahalok kontribui atu estraga sira nia ekosistema tasi nian liu husi prátika peska predatoria no uza instrumentu peska nian ne'ebé estraga ahu-ruin sira," dehan Sr. Marques.
"Blue Ventures suporta komunidade kosteira sira iha Bikeli hodi jere sira nia rekursu tasi nian liu husi implementa Tara Bandu.
"Ami iha ikan ho nia espesie liu 50 no espesie mariña seluk iha área konservasaun nian, inklui ikan pelagiku, ikan demersal, gurita, kuda-tasi, ikan tubaraun, lenuk, no espésie mariña sira seluk."
Blue Ventures mak organizasaun konservasaun tasi nian ida ne'ebé suporta komunidade kosteira iha área remota sira atu harii fali ekosistema tasi nian ne'ebé sustentavel.
"Ami nia programa tulun komunidade kosteira sira atu proteje sira nia espésie tasi nian, liuliu ikan, budu-tasi no ahu-ruin sira, no asegura sira nia reseita atu bele hadi'a sira nia moris." dehan Sr. Marques.
"Iha Tara Bandu, komunidade sira ne'ebé ami fó apoiu, estabelese restrisaun ba atividade peska nian, inklui mós utilizasaun rede no kilat-ikan nian. Aprosimasaun ida ne'e mós ajuda atu proteje ahu-ruin sira no suporta kreximentu dut tasi."
Nia mós ko'alia kona-ba oinsá servisu aviaun MAF nian importante ba sira hodi servisu tulun komunidade iha illa Atauro.
"Ami baibain semo beibeik ho aviaun MAF husi Dili ba Atauro, no sira ajuda duni ami, no organizasaun sira seluk, nune'e mós komunidade lokál sira iha illa Atauro," dehan Sr. Marques.
"Iha tempu udan, susar tebes ba ami atu sa'e ro, maibé aviaun MAF ajuda tebes ami.
"Ami hakarak kontinua nafatin ami nia parseria ho MAF, no ami agradese tebes ba sira nia komitmentu atu fó apoiu ba ami liu husi oferese voo durante tempu urjente."
MAF nia pilotu Joe Farren hato'o nia apresiasaun ba servisu husi Blue Ventures ho populasaun iha illa Atauro.
"Obrigadu ba serbisu ne'ebé imi halo daudaun. Momentu ne’ebe inkrível tebes no ha’u kontente tebes kuandu ha'u ba hamutuk ho ami nia funsionáriu sira, vizita Blue Ventures, haree serbisu ne'ebé sira halo, no sa'e peskadór nia ro ki'ik ida atu buka hatene kona ba ahu-ruin ne'ebé sira tau matan ba," nia hatete.
"Ida ne'e inkrível tebes tanba ami bele parseria ho ONG sira iha ne'e no fó impaktu boot liu ba sira iha área sira ne'ebé sira halo serbisu ba.
"Ami bele ajuda atu hasa'e impaktu ne'e liu husi fó diretamente meiu transporte ba sira, ba sira nia funsionáriu sira no ba sasán sira ne'ebé sira presiza."